Зошто немам трпение за детето од 21 месец кое постојано плаче?

Дете на возраст од 21 месец психолошки се наоѓа во фаза на повторно приближување кон мајката. По првиот роденден, детето влегува во фаза на истражување, кога со љубопитност го испитува светот околу себе - сѐ го интересира, но не ги препознава опасностите и не знае да се чува. По тој период, околу 18-тиот месец, детето влегува во фаза на повторно приближување кон мајката, бидејќи сфаќа дека светот не е секогаш безбеден и му е потребна мајчината емпатија, љубов и приврзаност за да се почувствува сигурно. Тоа е веројатно суштината на проблемот - детето се приврзува, а доколку го одбивате, тоа станува уште поневрозно и настанува проблем кој може да влијае на целиот негов понатамошен живот. Ваша должност е да ги следите потребите на детето и да ги задоволувате. Ако сте изморени, побарајте помош во домот, бидејќи најважно е сега да му се посветите на детето и да бидете чувствителни на неговите потреби. Децата не барале да ги родиме - тоа е наша одлука и одговорност, а основното што му е потребно на детето е мајчинска љубов. Веројатно го сакате своето дете, а прашањето е зошто немате доволно трпение. Затоа на вас ви е потребна помош, пред сѐ психолошка - побарајте совет од психијатар за да ви биде полесно да одговорите на потребите на детето, а и самите себеси да си олесните. Побарајте помош и од пријатели, роднини или институции доколку постојат други проблеми поради кои сте недоволно мотивирани да го исполните најважниот животен задаток и најубавата улога - мајчинството.