Како да се воспостави добар однос кон децата?

Родителството е прекрасна, но и сериозна и одговорна задача. По породувањето, жената има потреба од помош бидејќи е исклучително тешко да се посвети на нешто друго освен на новороденчето и доенчето. Затоа е потребна соработка на двајцата родители, а ако тоа не е возможно, секое блиско лице или доверлива платена помош може многу да придонесе - околу домашните работи, а делумно и околу бебето. Мајката има потреба од многу совети во врска со нега на детето. Советувалиштата при педијатриските служби имаат и печатени брошури за исхрана и нега на дете, а педијатарот може многу да помогне. Во библиотеките, како и на интернет, постои квалитетна литература за развојот на детето и родителството. Искуства можете да разменувате и со роднини или пријателки. Покрај огромната љубов и задоволство, мајчинството подразбира и доста откажување од сопствени потреби. Сепак, треба да се најде време и простор и за личните потреби. Тоа не мора да биде проблем ако имате поддршка од партнерот и семејството, како и добри институции за деца - јасли, градинки - заедно со редовни педијатриски контроли. Се надевам дека овој одговор ќе помогне подобро да се организирате и подобро да се чувствувате.