Како да се справам со конфликти со свекрвата?

Со среќа не живеете со свекрвата. Можете најпрво да одбивате да ја посетувате, со образложение дека ви пречат конфликтите со неа и дека со добра волја во моментот не можете да ги решите, а немате доволно време ниту енергија да се занимавате со свекрвата додека детето е мало. Освен избегувањето на средбите, можете уште еднаш да размислите за нејзините чувства, потреби и уверувања, како и за своите, и прецизно да согледате околу што всушност се судирате - прво на очи паѓа непочитувањето. Може да не се согласуваме и да имаме различни мислења, но треба да се почитуваме и покрај тоа што ставовите ни се разликуваат. Тоа е првото место од каде можете да почнете да менувате нешто. Размислете дали себеси доволно се почитувате и дали можете да не се навредувате толку кога ги знаете сопствените вредности. Побарајте почит и оптимална дистанца од која можете да комуницирате асертивно, а тоа значи почитувајќи се меѓусебно со право на различно мислење. Потоа, размислете, а потоа разговарајте со сопругот дали можете да живеете уште посамостојно и внимателно објаснете дека и вам и на сите ви е потребна асертивна комуникација, за која почитувањето е неопходен услов. Другите не можеме многу да ги менуваме, но можеме себеси, свој доживувај на себе и на светот, со задолжителна оптимална дистанца и почит. Оптималната дистанца ви дава чувство на мир и безбедност во сопствениот личен простор. Значи, повторно се враќаме кон себе и се менуваме во правец на позрела обработка на чувствата и мудрост. Односот меѓу снаа и свекрва често е напнат, полн со конфликти од многу различни причини. Но со создавањето на вашето ново семејство, вие и вашиот сопруг го создавате свој свет кој треба внимателно да се создава, негува и чува, дури и од најблиските, со должна почит и разбирање.