Како да се ослободам од стравот од животни?

Разбирливо е да се плашите од кучиња скитници, кои сè повеќе ги има на улиците. До извесна мера сочувствувам со Вас, но треба да се има предвид дека повеќето од овие кучиња се претходно стерилизирани и пуштени од засолништа, па обично не се агресивни. Тие најчесто се собираат наутро и навечер околу места каде има храна за нив, најчесто околу контејнери, и токму тогаш треба посебно да се избегнуваат. Преку денот обично се мирни и ако не им обрнувате внимание, најверојатно нема ни да Ве забележат. Ако покажете страв, тоа може да ги вознемири. Суштината на прашањето всушност е како да се ослободите од преголемиот страв и паника што ве обзема при средба со кучиња. Ако знаете дека тие се обично незаинтересирани и мирни доколку не ги гледате и ги заобиколувате, тоа би било најдобро решение. Обидете се да ги преиспитате уверувањата што стојат зад преголемиот страв - дали се реални, дали се логични и дали Ве водат кон целта, а тоа е мирно поминување покрај кучето без да му обрнувате внимание. Со менување на нерационалните уверувања во рационални, ќе се промени и квалитетот на чувствата. Ова е едно од можните решенија. Серија разговори во рамки на психолошко советување би била корисна и таков вид разговор можете да закажете.