Како да се контролира нервозата и стресот кои влијаат на здравјето?

Длабокото дишење и опуштањето на телото се прв чекор кон смирување на напнатоста, но потоа следи и препознавање на чувството што го имате – именувајте го тоа чувство и обидете се да ги препознаете сите телесни сензации поврзани со него. Потоа размислете која ваша потреба стои зад чувството, како и кое верување го поддржува. На пример, ако препознаете лутина, забележете тежина во телото, главата или стомакот, препознајте потреба да контролирате некоја ситуација, а верувањето може да биде ригидно и ирационално – дека светот околу вас мора да биде токму каков што сакате вие. Ирационалните верувања носат ригидно барање нештата да бидат „по наше“. Кога ќе го промениме барањето во желба, сè се менува на добро – верувањето станува реалистично и флексибилно, а чувството поздраво. На пример, наместо „светот мора да биде како што сакам“, подобро е да размислувате: „би сакал/а светот да биде по мој вкус, но ако не е, тоа е тешко, но не е неподносливо.“ Со тоа се менува квалитетот на чувството – чувствувате здрава лутина и имате можност да размислите што можете да промените, а она што не може да се промени треба да се прифати. Сето ова постепено се учи низ серија разговори со психолог, што е најдобриот пат. Потребни се време и трпение.