Зошто се јавуваат глад и треска (дрхтавица)?

Во текот на гладувањето се намалува концентрацијата на гликоза во крвта, што доведува до намалено лачење на инсулин и зголемено лачење на хормони кои делуваат спротивно на инсулинот, при што се намалува нивото на гликоза во периферните ткива, мускулите и масното ткиво. Симптомите на хипогликемија обично се јавуваат кога нивото на шеќер ќе падне под 3 милимоли/л, но можат да се јават и при повисоки вредности на шеќер доколку дојде до негов нагол пад во крвта. Овие симптоми се манифестираат со треска (дрхтавица), нервоза, потење и забрзано чукање на срцето. Утринските хипогликемии можат да бидат знак на предијабетна состојба. Честите знаци на хипогликемија треба сериозно да се сфатат и најдобро е да се обратите кај својот избран лекар, кој ќе ве упати кај ендокринолог за спроведување на клинички испитувања. Инаку, оброците не треба да се прескокнуваат. Потребно е во текот на денот да се земаат повеќе оброци со помали количини храна. Освен рамномерноста на оброците (обично тоа се три главни оброци - појадок, ручек и вечера - и една до две ужини), потребно е да се внимава да се консумираат намирници од сите групи. Овие намирници треба да се комбинираат во различни јадења така што исхраната ќе биде оптимална - ниту преобилна, ниту недоволна.