Зошто не можам да добијам на тежина?

Потхранетост е состојба која настанува како последица на недоволен или неурамнотежен внес на јаглехидрати, протеини и други хранливи материи. Доколку калориската вредност на храната не е доволна, организмот е принуден своите енергетски потреби да ги надополнува со разградување на сопствените резерви (мускули, поткожно масно ткиво), што може да има тешки последици за здравјето. Во текот на режимот на исхрана кај потхранети лица треба да се има на ум дека поради подолготраен намален внес на храна може да дојде до намалена толеранција кон храна, па количината и енергетската вредност на оброците треба постепено да се зголемуваат. Режимот се спроведува во неколку фази. Во првата фаза важно е да се надополнат градивните и заштитните материи (белковини, витамини, минерални материи), при што лицето треба да мирува. Втората фаза подразбира зголемување на внесот на енергетски материи (јаглехидрати, масти/масла) и заштитни материи, со можност за кратка лесна прошетка. Во третата фаза внесот на хранливи материи дополнително се зголемува додека не се достигне идеална телесна маса. Тогаш внесот на храна се намалува на количина која ќе овозможи одржување на идеалната телесна маса. Кога станува збор за избор на намирници, во почетокот треба да се бираат намирници кои се лесно сварливи, со помалку влакна. Препорачливо е во почетокот да се пасира зеленчукот и овошјето. Препорачливо е да се подготвуваат сокови од овошје и зеленчук. Предност треба да се даде на белото и полубелото брашно поради помалата содржина на влакна. Кога станува збор за месо и риба, во почетокот е препорачливо да се консумираат посни видови, со избегнување на пржење и пржење во тесто. Во почетокот е препорачливо да се консумира млеко и млечни производи со поголем процент на млечна маст. Намирниците треба да се распределат во повеќе помали оброци. По секој оброк се препорачува мирување од најмалку 20 минути.