Што е органска храна и дали поврќето купено на пазар е органско?

Под поимот органска храна се подразбира храна која се одгледува на природен начин - на чисто и здраво земјиште, во чиста околина и без употреба на хемиски средства (пестициди и хемиски ѓубрива), и не содржи генетски модифицирани организми. Органската храна мора да стигне до потрошувачот без никакви додатоци, како прехранбени адитиви, и не смее да биде третирана со зрачење. Во нашето поблиско минато немаше ни смисла да се зборува за ова бидејќи друга храна и не постоеше. Во моментов, во Европската унија, потребно е производителите на храна да добијат посебен сертификат за органско производство за да можат своите производи да ги пласираат како „органски“. Органската храна на пазарот е значително поскапа во однос на конвенционалната храна, дури и до два пати. На некои пазари постојат тезги со органски одгледувана храна. Вкусот и мирисот на органската храна значително се разликуваат од храната што секојдневно ја јадеме, и кај постарата популација често потсетува на младоста, кога, на пример, доматот имал сосема поинаков вкус и се јадел како јаболко.