Што да се прави ако сте премногу мршави?

Потхранетост е состојба која настанува како последица на недоволен или неурамнотежен внес на јаглехидрати, протеини и други хранливи материи. Доколку калориската вредност на храната не е доволна, организмот е принуден да ги надополнува енергетските потреби со разградување на сопствените резерви (мускули, поткожно масно ткиво), што може да има тешки последици по здравјето. Во текот на режимот на исхрана кај потхранети лица треба да се има предвид дека поради подолг период на намален внес на храна може да дојде до намалена толеранција кон храната, па количината и енергетската вредност на оброците треба постепено да се зголемуваат. Режимот се спроведува во неколку фази. Во првата фаза важно е да се надополнат градивните и заштитните материи (белковини, витамини, минерали), при што лицето треба да мирува. Втората фаза подразбира зголемување на внесот на енергетски материи (јаглехидрати, масти/масла) и заштитни материи, со можност за кратка лесна прошетка. Во третата фаза внесот на хранливи материи дополнително се зголемува сè додека не се достигне идеална телесна маса. Тогаш внесот на храна се намалува на количината која овозможува одржување на идеалната телесна маса. Што се однесува до изборот на намирници, во почетокот треба да се бираат намирници кои се лесно сварливи, со помалку влакна. Пожелно е во почетокот и да се пасира зеленчукот и овошјето, како и да се подготвуваат сокови од овошје и зеленчук. Предност треба да се даде на бело и полубело брашно поради помала содржина на влакна. Кога станува збор за месо и риба, пожелно е во почетокот да се консумираат посни видови, со избегнување на пржење и панирање. Пожелно е во почетокот да се консумира млеко и млечни производи со поголем процент на млечна маст. Намирниците треба да се распоредат во повеќе помали оброци. По секој оброк се препорачува мирување од најмалку 20 минути. — Нутриционист