Слаткиши во пубертетот - дали се штетни?

Пубертетот е период на брзи физички, биохемиски, психолошки и интелектуални промени кај децата. Се менуваат коскениот систем, пропорциите на деловите на телото, органите и составот на ткивата. Енергетските потреби се најголеми токму во овој период. Грешка е преголемото консумирање на било кој вид намирница, а особено на слаткиши. Поради промените во хормоналниот статус, во овој период се јавува голема желба за слатко. Шеќерот е важен и неопходен извор на енергија за физичка активност и учење, но најважно е од која храна го внесуваме. Овошјето е добар извор не само на шеќер, туку и на витамини и минерали неопходни за развој и нормално функционирање. Секојдневната ужина со овошје ја намалува потребата за поголема количина шеќер што потекнува од разни бисквити, крофни, чоколади, колачи и слично. Парче темно чоколадо со 70% какао, енергетска плочка, јогурт со овошје се исто така добра замена за кондиторски и пекарски производи. Доколку се јави желба за некој од овие производи, таа може повремено да се задоволи, се разбира во умерени количини. Купувните сокови исто така содржат големи количини шеќер, па е препорачливо да се користат домашно цедени овошни сокови и лимунада.