Прекумерна тежина кај деца - што да се прави?

Дебелината и прекумерната тежина се последица на продолжен позитивен енергетски баланс, кога внесот на енергија го надминува нејзиниот трошок. Некои деца имаат генетска предиспозиција кон дебелина. Многу студии покажале дека дебелите деца не јадат повеќе од своите врсници. Исто така, разни хормонални нарушувања можат да предизвикаат дебелина. Нутритивните мерки кај дебели деца треба да се спроведуваат со посебна претпазливост за да не се загрози нивниот раст и развој преку евентуален нутритивен дефицит што би можела да го предизвика неадекватна ригорозна и долготрајна редукциона диета. Затоа целта на секоја редукциона диета кај деца мора да биде постигнување на здрава тежина без попречување на растот. Типичните диети кај деца подразбираат намален внес на масти и вкупна енергија, односно се хипокалорични. Утврдено е дека диетата во комбинација со вежбање го зголемува губењето на тежина повеќе отколку самата диета. За ова е потребно големо трпение и упорност, со помош на педијатар и нутриционист. Неопходно е да следите што јаде вашето дете, бидејќи родителите се одговорни за неговата исхрана. Не наградувајте го детето со храна, туку охрабрувајте физичка активност. Научете го детето дека постои храна која може да се јаде постојано (овошје и зеленчук), храна која се јаде повремено (некои видови месо) и храна која се консумира само во специјални прилики (слатки и торти). Не форсирајте го детето да јаде кога не е гладно. Ограничете го времето пред телевизор и компјутер. Избегнувајте брза храна. Пронајдете здрава опција и инсистирајте на физичка активност. Клучот е во промена на навиките.