Прекумерна телесна тежина кај дете од училишна возраст - каква диета се препорачува?

Прво обратете се кај детски педијатар за да му се провери крвниот притисок и нивото на шеќер во крвта, како и телесната маса и висината. Педијатарот ќе процени дали детето треба да се упати кај лекар специјализиран за нарушувања во исхраната. Намирниците во исхраната на детето треба да бидат разновидни. Обидете се да го поттикнете да внесува овошје и зеленчук, да јаде риба барем еднаш неделно, а повремено понудете му и скробни намирници како тестенини и ориз, кои го продолжуваат чувството на ситост. Јогуртот и млекото со намален процент масти, како и младото сирење, се неопходни за развојот на детето бидејќи се богати со калциум. Сепак, мора да се ограничи внесот на слатки - избегнувајте да купувате и да чувате во домот бисквити, чоколади и грицки. Внимавајте и на намирниците богати со масти, како пржени шницли или шницли полнети со сирење или кајмак, помфрит - едноставно не подготвувајте храна на тој начин и избегнувајте секојдневен внес на сувомеснати производи преку сендвичи. Исфрлете ги колачите и купените овошни сокови - две до три коцки чоколада се доволен внес на слатки. За да бидат оброците урамнотежени, се препорачува ако зеленчукот бил за ручек, тогаш скробните намирници да се јадат навечер, или обратно, со додаток на парче месо, риба или едно јајце во текот на денот. Обрнете внимание дали детето има навика да јаде додека гледа телевизија или голта нешто крај компјутерот, бидејќи тогаш се внесува голема количина храна. Неопходно е детето да дојде на училиште откако ќе појадува дома. Разбудете го детето петнаесет минути порано за да има време за појадок, и нека некој од семејството појадува заедно со него. Се препорачува сендвич со додаток на зеленчук, палента, парче интегрален леб со рибина паста (домашно приготвена) или житарки со млеко. Убедете го да носи овошје за ужина во училиште. Детето треба да се поттикнува да јаде побавно, преку разговор и дружење за време на оброкот. И секако, поттикнете го да се занимава со спорт, на пример пливање, возење велосипед или ролери, и задолжително да ги посетува часовите по физичко воспитание во училиштето. И знајте - воопшто не е лесно да се истрае, нема брзо решение. Постепеното намалување на телесната маса од месец во месец е вистинскиот пат кон успех, а вие треба максимално да се потрудите да му помогнете на своето дете.