Колку вода дневно може да се пие?

Водата е најважниот макронутриент бидејќи се грижи за низа витални функции во нашиот организам. Внесот на течности е неопходен за нормално функционирање на бубрезите, срцето и кардиоваскуларниот систем. Улогата на водата во организмот е разновидна: речиси сите хемиски реакции во телото бараат вода, таа помага во регулацијата на телесната температура и во одржувањето на pH рамнотежата. Околу 60% од телесната тежина на возрасните луѓе токму е вода. Мал недостаток на вода во организмот може да предизвика умор, главоболка и намалена концентрација. Дневно во просек губиме 2,5 литри течност преку урина и фецес, потење, дишење и слично. Во случаи на дијареа, повраќање или покачена телесна температура, организмот губи особено големи количини на вода и електролити, кои е потребно да се надоместат. Бременоста и доењето се посебни состојби кои бараат дополнителни потреби за течности. Секогаш треба да се има на ум дека дехидрацијата може да доведе до сериозни компликации. Секојдневно треба да внесуваме онолку течност колку што сме потрошиле, при што треба да знаеме да вода внесуваме и преку храната. Во согласност со тоа, се смета дека дневниот внес треба да биде 1,5-2 литри течност. Разбирливо, кај лица кои се изложени на зголемена телесна активност, како и кај бремени жени и доилки, потребите за течности се зголемени. Треба да се разликува флаширана вода за пиење од минерална вода. Флаширана вода за пиење може да се пие како чешмовачка вода во неограничени количини, додека минералната вода треба да се пие во количина од 1 до 2 чаши дневно. На пазарот постои голем број флаширани и минерални води. Здравствено безбедна чешмовачка и флаширана вода за пиење можат да се пијат неограничено.