Која дијета е најдобра?

Поимот дијета потекнува од латинскиот збор diaeta, што означува уреден начин на живот во однос на храна, пијалаци, спиење, одмор, физичка активност и друго. Правилниот начин на исхрана подразбира пет оброци дневно - три главни и две ужини, а многу е важно оброците да бидат распоредени во текот на денот. Најздраво е да се мршави со нормална редукциона дијета и со внес на сите видови намирници. Тоа подразбира секојдневно консумирање зеленчук и овошје, интегрални житарки, млеко и млечни производи, месо најмногу 2-3 пати неделно, и риба два пати неделно, притоа морска риба која е богата со омега-3 масни киселини. Денес имаме неограничен пристап до храна, но не сме доволно активни, што создава притисок врз системот за регулација, па регулацијата на енергетскиот баланс е нарушена, а луѓето стануваат гојазни. Клучот на решението е во паметен внес на храна и физичка активност. За да се подобри метаболизмот, што прави организмот подобро да ги користи своите природни механизми за регулација на телесната тежина, физичката активност многу помага. Вежбањето, исто така, ги развива мускулите, а колку повеќе мускули имате, толку повеќе калории се потребни за одржување на базалниот метаболизам. Многу дијети, иако популарни, немаат медицинско оправдување. Стручњаците од областа на исхраната тврдат дека не постојат докази дека пристапот кон исхраната во кој се избегнуваат определени групи намирници долгорочно помага при мршавење. Евентуално, може да се примени „медитеранска дијета“, која денес се смета за најздрав начин на исхрана, секако придружена со редовна физичка активност.