Кои витамини и суплементи да се земаат при строга дијета кај колитис?

Кај пациенти со воспалителни болести на цревата најчесто се препорачува внес на витамин Е, фолна киселина (особено ако се користи терапија со сулфасалазин, која може да предизвика дефицит на фолна киселина) и цинк, во стандардни дневни дози. Од дијететските суплементи корисни се пробиотици, посебно при истовремена употреба на антибиотици. Околу 66% од пациентите со улцерозен колитис имаат дефицит на железо, кој настанува поради хронично, окултно или изразено крварење. Во зависност од нивото на железо, лекарот препорачува течни или цврсти препарати на железо, при што дозата зависи од степенот на дефицитот и индивидуалната подносливост. Корисни можат да бидат и омега-3 масните киселини, чии добри извори се ленено масло (една супена кашичка дневно, самостојно или во комбинација со салата) и рибино масло (околу две кафени кашичиви дневно, што обезбедува приближно 2 грама омега-3 масни киселини). Сепак, употребата на овие суплементи треба да се договори со гастроентеролог, кој има целосен увид во клиничката слика на болеста. Се препорачува и водење дневник на исхрана, во кој се запишува сѐ што е внесено во текот на денот, вклучувајќи ужини, со цел полесно да се препознаат намирниците што предизвикуваат тегоби. Бидејќи режимот на исхрана е индивидуален, корисно е да се побара совет и од специјалист по исхрана.