Кои се придобивките и изворите на омега 3 масни киселини?

Омега 3 масните киселини се есенцијални компоненти неопходни за живот, а телото не може самостојно да ги произведе. Тие имаат многу позитивно дејство на организмот: намалуваат количината на триглицериди во крвта, го подобруваат циркулирањето, спречуваат појава на атеросклероза, кардиоваскуларни заболувања, создавање тромби и депресивни нарушувања. Симптомите на недостаток на омега 3 масни киселини се замор, слабо паметење, сува кожа, проблеми со срцето и промени во расположението. Најмногу омега 3 масни киселини има во сините риби. Најбогати извори се скушата, сардината, харингата, лососот, сардините, езерската пастрмка, моруната и туната. Помали количини содржат ракот, јастогот, шкампите, дагњите, остригите и лигњите. За најдобро искористување на овие масни киселини, рибата треба да се испече или кратко да се готви. Пржењето или друг начин на подготовка со додавање масло ја намалува ефикасноста на омега 3 масните киселини од рибата. Исто така, со цедење на маслото од конзервираната туна се исфрлаат 15 до 25% од омега 3 масните киселини. Одредени количини омега 3 масни киселини се наоѓаат и во растителни намирници, најмногу во ореви, ленено и репкино семе и масло. За да омега 3 масните киселини имаат позитивно дејство, не е потребна голема количина риба, туку доволно е да се јаде риба два до три пати неделно.