Кое овошје е најздраво?

Овошјето припаѕа во биолошки вредна и омилена група намирници. Се употребува во сурова состојба или во вид на преработки. Обично се дели во две групи: овошје богато со вода и овошје богато со масти (јатчесто овошје). Суровото овошје богато со вода, односно сочно овошје (цреши, вишни, јаболка, круши, грозје, јагоди, малини, купини, боровинки, лубеници, дињи, кајсии, праски, лимон, портокали, смокви и др.) има висока содржина на вода (над 80%), мала енергетска вредност, голема освежителна моќ, мала содржина на белковини и масти, а нешто поголема содржина на јаглехидрати во вид на глукоза, фруктоза, сахароза и скроб. Ова овошје е драгоцен извор на витамини и минерали, па се користи и во случаите кога е потребно да се зголеми обемот на дневниот оброк, а да се намали неговата енергетска вредност. Диететската вредност зависи од зрелоста и свежината на овошјето — со подолго стоење се намалува неговата биолошка вредност. Јатчестото овошје (орев, бадем, лешник, кикирики) се одликува со висока содржина на масти, со доминација на полинезаситени масни киселини, и висока содржина на белковини со добар аминокиселински состав, поради што има висока енергетска вредност. Препораката е овошјето да се јаде секојдневно, одделно како ужина, а не како десерт покрај главниот оброк.