Какви се препораките за здрава исхрана и избор на физичка активност?

Правилниот начин на исхрана подразбира пет оброци дневно - три главни и две ужинки, при што е важно да се одржува редовност во исхраната. Најздраво е да се консумираат сите видови намирници, што значи секојдневно внесување на зеленчук и овошје, интегрални житарки, млеко и млечни производи, месо најмногу 2-3 пати неделно, и риба два пати неделно, најдобро морска риба богата со омега-3 масни киселини. Денес имаме неограничен пристап до храна, но не сме доволно физички активни, што нарушува природната регулација на енергетскиот баланс и води до зголемување на телесната тежина. Клучот на решението е во паметен внес на храна и редовна физичка активност. Физичката активност помага да се подобри метаболизмот, односно организмот подобро да ги користи своите природни механизми за регулација на телесната тежина. Вежбањето, исто така, развива мускулна маса, а колку повеќе мускули има телото, толку повеќе калории се потребни за одржување на базалниот метаболизам. Стручњаците од областа на исхраната истакнуваат дека нема докази дека избегнувањето на одредени групи намирници долгорочно помага во одржување на телесната тежина. Затоа, наместо строги ограничувања, може да се практикува медитеранскиот начин на исхрана, кој денес се смета за еден од најздравите модели на исхрана, во комбинација со редовна физичка активност, по можност со совет од стручно лице за физичка активност и спорт.