Каква треба да биде исхраната по хемотерапија?

Исхраната кај карцином на дебелото црево е многу важна за понатамошниот тек на болеста, покрај медикаментозната терапија. Исхраната влијае и на превенцијата, и на забавувањето, а поретко и на застанувањето на процесот на канцерогенеза. Намирници кои обезбедуваат нутритивна заштита кај малигните болести се: легуминозите, бобичавото и јагодичавото овошје, зеленчук од групата зелка (зелка, броколи, карфиол, брокулица), зелено лиснато зеленчук, семки, лук, грозје и сок од грозје, зелен чај, домати, соја, и намирници од цело зрно. Предност треба да се даде на намирници богати со растителни влакна и антиоксиданси, особено кога се работи за овошје и зеленчук. Во исхраната секојдневно треба да се вклучат трици, печурки и риба. Намирниците треба да се користат свежи или подготвени со варење, на пареа или на грил плоча. Треба да се избегнува подготовка на храна со пламен и чад. Во исхраната треба да се избегнува црвено месо, месни преработки, храна со голема количина сол, солена риба и конзервирана храна. Треба да се избегнува храна со висока енергетска густина (брза храна), производи од бело брашно и шеќер. Треба да се намали внесот на масти (особено животински) и да се ограничи внесот на алкохол. Важно е да се постигне и одржи телесна маса во оптимални граници, што може да се постигне со прилагодена физичка активност. Потребно е храната да биде здравствено безбедна и да не содржи недозволени супстанции. Не се препорачува употреба на суплементи, витамини, минерали и фитохемикалии за превенција на болеста. Постојана рамнотежа на правилна исхрана и начин на живот е неопходна за превенција на канцерогени заболувања.