Каква треба да биде исхраната на студентите?

Навистина е тешко да се одржи соодветна тежина ако се храните во студентска менза, каде што сè е масно и вкусно, бидејќи маснотиите му даваат вкус на храната. Меѓутоа, не е сè залудно ако имате соодветна физичка активност. Ако појадувате во мензата, лебот јадете само за појадок, а покрај тоа јадете една варена наденица или варено јајце или омлет, со додаток на нешто зеленчук, на пример домат, и пијте јогурт или кисело млеко. Понекогаш јадете и џем со парче леб и чај. Појадокот не треба да го прескокнувате – еден ден менза, а друг ден во собата подгответе овесна каша (100 ml млеко со помалку од 1% масти, 150 ml вода и 3 супени лажици овесни пахулки се вари во тенџерче. Кога масата почне да се згуснува, се додава на коцки исечено или ренде јаболко и една супена лажица мелени ореви, лешници или бадеми. Кашата треба да зовре и да се вари до посакувана густина). Овесните пахулки можат и да се преполиваат со јогурт или свежо исцеден овошен сок и да се остават неколку минути да омекнат. Исто така, може да се измешаат овесни пахулки, ленено семе, семки од сончоглед и тиква и да се додадат во јогурт. Ако сте на факултет, за ужина јадете овошје или дланка од ‘студентски микс’ (разно јаткасто овошје). За ручек во мензата бирајте варени јадења без леб и салата (зелка, боранија, грав, ѓувеч), а од пржено месо во тесто отстранете ја пржената корица и оставете само чисто месо. Тестенини јадете најмногу еднаш неделно. За вечера, ако учите ноќе, може тестенини со сирење или ризото од ориз, инаку за вечера бирајте зеленчук или некоја супа или чорба, но одстранете една супена лажица од површинската маснотија во чинијата. Ако имате десерт по ручек, зачувајте го за попладневна ужина. Донесете тост од дома, па можете да тостирате леб (на пример тонус) и во собата понекогаш да јадете туна со кромид. Со вакви корекции и со физичка активност најмалку четири пати неделно (брзо од 3 до 4 km), заедно со лесен десерт (пудинг, чоколадна кора или житна лента), ќе одржите добра линија.