Каква исхрана се препорачува по мозочен удар?

Кај кардиоваскуларните заболувања, покрај лековите, потребно е да се применат и општи мерки - зголемување на физичката активност, намалување на напнатоста и, што е многу важно, внимание кон исхраната. Правилниот начин на исхрана е клучен во превенцијата и лекувањето на кардиоваскуларните заболувања, како и во спречувањето на многу други болести, како дијабетес, дебелина и покачени масти во крвта. Во исхраната може да се примени медитеранската дијета, која денес се смета за најздрав начин на исхранување. Таа подразбира внес на храна со малку заситени, а многу незаситени масти и диетални влакна (маслиново масло, сусам, орев, авокадо, репкино масло, ленено масло). Маслиновото масло го намалува холестеролот и крвниот притисок, па претставува добра замена за путер и маргарин. Обилството на овошје и зеленчук (листово зеленчук, салати, зеленчукови супи) помага во намалување на телесната маса и регулирање на мастите и шеќерот во крвта. Треба да се јадат цели зрна житарки, варена пченица, леќа и разновидни мешунки. Сината риба е богата со омега-3 полинезаситени масни киселини, кои го намалуваат нивото на триглицериди, холестерол, крвен притисок, како и факторите на воспаление и тромбоза. Потребно е најмалку три пати неделно да се внесе морска риба во исхраната. Кај кардиоваскуларните заболувања многу е важно да се ограничи внесот на сол. Прекумерниот внес на сол предизвикува покачен крвен притисок, кој е поврзан со срцеви заболувања и мозочен удар. Секоја препорачана дијета мора да биде индивидуална, во согласност со нутритивната и општата здравствена состојба на пациентот. Неопходна е и физичка активност, која треба да одговара на способностите и можностите на секој пациент.