Каква исхрана се препорачува кај пациенти со камен во бубрегот?

Дијететските мерки се корисни во превенцијата на создавање камен во бубрезите и мочните патишта, а придонесуваат и за побрзо излекување. Лицата склони кон создавање камења треба да го намалат внесот на животински протеини, бидејќи тие го зголемуваат нивото на калциум, оксалати и мочна киселина во урината. За да се намали излачувањето на калциум преку урината, исхраната треба да содржи повеќе влакна. Пожелно е да се намали внесот на намирници богати со оксалати (мешунки, чоколадо, инстант кафе, спанаќ, морков, целер, краставица, грејпфрут, ореви, чај). Дневниот внес на течности треба да изнесува најмалку 2 литри. Внесот на кофеин и алкохол треба да се ограничи. Повремено се препорачува и суплементација со витамин Б6 и магнезиум. Дијететските препораки имаат свои специфичности во зависност од видот на присутните камења.