Како се утврдува недостаток на хранливи материи преку лабораториски анализи?

Во биохемиските лаборатории, од крв се анализира нивото на железо, натриум, калиум, калциум и магнезиум со рутински методи, а можно е и одредување на витамин 25-ОН-Д3, К, Е, Б6 и Б12, фолна киселина и бета-каротин, како и бакар, цинк, селен, алуминиум, хром и јод. Освен во крвта, количината на бакар и цинк може да се одреди и од урина и коса. Некои лаборатории вршат и анализа на статусот на омега-6 и омега-3 масни киселини, но повеќе за истражувачки цели. Сите овие се скапи биохемиски методи кои бараат добро обучен лабораториски кадар. Совет е првично да се направат основни лабораториски анализи и да се разговара со стручно лице од областа на исхраната за моменталниот начин на исхрана и за промените забележани во сопственото здравје, бидејќи тие можат да укажат на дефицит на одредени витамини. Од лекар може да се добие совет како да се коригира и подобри исхраната, со евентуална препорака за внес на суплементи. Со разновидна и урамнотежена исхрана се обезбедуваат сите потребни витамини и минерали за организмот.