Изразена мршавост и слабост и покрај уредни анализи – што значи тоа?

Потхранетост е состојба која настанува како последица на недоволен или неурамнотежен внес на јаглехидрати, белковини и други хранливи материи. Ако калориската вредност на храната не е доволна, организмот е принуден да ги надополнува своите енергетски потреби преку разградба на сопствените резерви (мускули, поткожно масно ткиво), што може да има тешки последици за здравјето. Во текот на режимот на исхрана кај потхранети лица треба да се има на ум дека поради подолг период на намален внес на храна може да дојде до намалена толеранција кон храна, па количината и енергетската вредност на оброците треба постепено да се зголемуваат. Режимот се спроведува во неколку фази. Во првата фаза важно е да се надополнат градивните и заштитните материи (белковини, витамини, минерални материи), при што лицето треба да се одмара. Втората фаза подразбира зголемување на внесот на енергетски (јаглехидрати, масти/масла) и заштитни материи, со можност за кратка лесна прошетка. Во третата фаза внесот на хранливи материи дополнително се зголемува додека не се достигне идеална телесна маса. Тогаш се намалува внесот на храна на количината која ќе овозможи одржување на идеалната телесна маса. Кога станува збор за избор на намирници, во почетокот треба да се бираат намирници кои се лесно сварливи, со помалку влакна. Препорачливо е во почетокот да се пасира зеленчукот и овошјето, а исто така да се подготвуваат сокови од овошје и зеленчук. Предност треба да се даде на белото и полубелото брашно поради помала содржина на влакна. Кога станува збор за месо и риба, во почетокот е препорачливо да се консумираат посни видови, со избегнување на пржење и пецење во тесто. Исто така, препорачливо е во почетокот да се консумира млеко и млечни производи со поголем процент на млечна маст. Намирниците треба да се распределат во повеќе помали оброци. По секој оброк се препорачува одмор од најмалку 20 минути.