Дали пивото може да замени оброк?

Пивото е пијалак што се добива со алкохолно ферментирање на слад од житарки, најчесто јачмен, со додаток на вода, хмељ и квасец. Покрај вода, во пивото има поголеми количини јаглехидрати и алкохол (2-4%), поради што е калорично пијалак. Сепак, пивото е богат извор на витамини од Б групата (рибофлавин и ниацин), горчливи материи и хмељ, одредени количини нефементирани шеќери, минерали (калциум, железо, хром, бакар, силициум...), протеини, млечна киселина, глицерин и пуринови бази. Составот укажува на хранлива вредност и освежувачки вкус. Пивото го зголемува апетитот, помага при варење на храната, влијае на зголемување на HDL-холестеролот во крвта, делува антисептички против штетни бактерии во организмот и делува како благ диуретик, помагајќи ја работата на бубрезите. Алкохолот е калоричен и се смета дека ја намалува способноста на организмот да согорува масти. Прекумерното внесување на која било намирница или пијалак ќе доведе до натрупување масно ткиво. Ако се внесе премногу пиво, можат да се јават масни наслаги, особено околу стомакот. Таканаречениот „пивски стомак“ е предизвикан од вишок алкохолни калории кои се натрупуваат како маснотии. Пиењето алкохол честопати е поврзано со консумирање тешка и масна храна и нездрави грицки. Ако пивото се пие во поголеми количини, вишокот алкохол се насобира во крвта, ги нарушува функциите на црниот дроб, ја зголемува млечната киселина во телото и предизвикува замор, односно мамурлак. Многумина посегнуваат по студено пиво како освежување во текот на топлите летни денови. Сепак, консумирањето алкохол не се препорачува при голема жештина, бидејќи алкохолот дополнително ја дехидрира организмот. Просечно пиво содржи околу 150 калории, а ако се пие поголема количина, ќе се натрупаат непотребни калории и дополнително ќе се зголеми апетитот. Основното правило е дека алкохолот треба да се избегнува, а ако сепак се консумира, тоа да биде во умерени количини. А дали пивото може да замени оброк? Секако дека не, но може да се пие во умерени количини како придружба на оброк.