Дали недостатокот на магнезиум предизвикува грчеви во мускулите?

Магнезиумот е минерал кој во последно време станал многу популарен додаток во исхраната, бидејќи е важен за основните физиолошки функции во организмот. Во телото најголемиот дел се наоѓа во коските, а помал дел како слободен јон во клетките и плазмата. Има важна улога во врзувањето на калциумот за коските, во опуштањето на мускулите и активноста на разни ензими, го штити срцето и крвните садови и го снижува холестеролот. Мускулите и нервите не можат без него, бидејќи регулира пренос на надразнувањата до мускулите, спречува трепкање и треперење, што е важно за правилна работа на срцето. Овој елемент ја регулира и работата на цревата, особено кај луѓе со опстипација. Кај бремени жени го намалува ризикот од спонтан абортус и предвремено породување. Нормалната активност на магнезиумот зависи од меѓусебниот однос на калциумовите и магнезиумовите јони, а не само од апсолутната количина на магнезиум. Магнезиум има во многу намирници, особено во листовите на растенијата, легуминозите, интегралниот леб и ориз, орасите, бадемите, лешниците, кикиритките, сушените смокви и кајсии, темната чоколада и минералната вода. Општи знаци на недостаток на овој минерал се затвор, губење на апетит, раздразливост, несоница, главоболка, послаба концентрација, општа слабост и грчеви во мускулите. Дефицит на магнезиум често е причина за болни грчеви во мускулите на нозете кои се јавуваат ноќе и ве будат од сон. Дневните потреби од магнезиум се од 0,2 до 0,5 грама, а се поголеми кај спортисти, доилки и лица што се занимаваат со тежок физички труд. Газираните сокови и алкохолот го спречуваат неговото впивање во тенкото црево, додека хормоните на стрес и престојот во сауна поттикнуваат негово губење од организмот.