Дали е добро да се јаде банана на празен стомак?

Бананата е тропско овошје, но денес е достапна за исхрана низ целиот свет во текот на целата година. Нутриционистички гледано, бананата е многу вреден плод бидејќи содржи многу витамини (А, Б6, фолна киселина и витамин Ц) и минерали (фосфор, манган, магнезиум, калиум). Содржи природни шеќери - сахароза, фруктоза и глукоза, поради што е многу погодна за спортисти бидејќи дава моментална енергија. Бананата во исхраната најчесто се користи како десерт. Таканаречената „банана-диета“ подразбира секое утро за појадок да се јадат една до две банани и да се пие вода. Познато е дека појадокот е многу важен и неопходен и дека ни дава енергија, па оттука произлегува дека бананата е идеална за појадок. Сепак, оваа диета не е медицински оправдана бидејќи во текот на денот е потребно да внесуваме разновидни намирници. Сите диети кои се промовираат без физичка активност не даваат трајни резултати.