Дали диетата заснована на тестови за интолеранција на храна е оправдана?

Ако проблемот е само прекумерна телесна тежина, најдобро е да се придржувате до принципите на правилна исхрана - да ги намалите количините на храна и, доколку здравствената состојба дозволува, да ја зголемите физичката активност. Нема медицинска оправданост за користење на тестови за интолеранција на храна како средство за намалување на телесната тежина. Одрекувањето од одредени намирници може да има негативен ефект врз здравјето, бидејќи резултатите од овие тестови најчесто покажуваат дека треба да се исклучат намирници кои се карактеристични за исхраната на нашето подрачје. Таков начин на исхрана може да доведе до малокрвност, а дури и до пад на имунитетот. Организмот има потреба од сите важни хранливи материи - белковини, масти, јаглехидрати, како и заштитни материи (витамини, минерали и олигоелементи), од кои некои мора да се внесуваат секојдневно бидејќи организмот нема резерви од нив. Најдобри резултати во намалувањето на телесната тежина покажуваат умерено рестриктивни и балансирани диети (не помалку од 1200 килокалории дневно), заснованипринципите на правилна исхрана - порано преку пирамидата на здрава исхрана, а во последните години преку концептот на „тањир на правилна исхрана“ (составен од 30% житарки, 30% зеленчук, 20% протеини и 20% овошје, плус чаша обезмастено млеко или јогурт). Иако тестовите на интолеранција на храна немаат научна основа, факт е дека се многу популарни и дека има луѓе кои изгубиле на тежина и се чувствувале подобро по примена на препораките добиени по тестот, особено оние кои имале чести надувувања и гасови. Меѓутоа, поголемиот број луѓе брзо ја враќаат изгубената тежина, а некои дури и ја зголемуваат, особено кога резултатите од тестот дозволуваат внес само на малку, високо-калорични намирници.