Зошто болката во крстите се шири кон колкот и коленото при подолго стоење?

Овој проблем може да биде безопасен, но може и да биде посериозен, во зависност од многу фактори. Бидејќи болката се јавува при подолго стоење и со времето се влошува, препорачливо е прво да се обратите кон лекар од општа пракса, кој треба да Ви укаже потреба од рентген снимка на лумбосакралниот дел на пределот на колонава или магнетна резонанца на пределот на колонава, за да се утврдат промени на колоната, кои во голем број случаи се причина за вакви тегоби. Потоа е добро да се направи преглед кај ортопед. Најчесто, вакви симптоми укажуваат на лумбален синдром или дискус хернија. Кога дискот се помести од меѓупршленскиот простор во слабинскиот дел на колоната, доаѓа до притисок врз нервниот корен. Кај дискус хернија, болката може да се шири од задникот, преку нозете до глужните и стапалата, поради воспаление на исхијадичниот нерв во колонскиот канал. Затоа секоја болка во нозете, вклучувајќи и чувство на трнење, треба да се пријави на лекар. Исто така, препорачливо е да се направат основни лабораториски анализи – крвна слика, преглед на срце, шеќер во крвта, а по потреба и проширени биохемиски анализи, во договор со надлежниот лекар. Рентгенот или магнетната резонанца ќе покажат точната причина за тегобите. До добивање на дијагноза, корисно е да се користат ортопедски влошки, да се внимава на исхраната со редовни и почести оброци, да се контролира телесната тежина, а по совет на лекар може да се вклучат и одредени витамини и минерали. Во секој случај, најважно е да се обратите на надлежен лекар за понатамошна проценка.