Дали прекумерна доза парацетамол може да предизвика рак на црниот дроб?

Многу лекови можат да предизвикаат оштетување на црниот дроб доколку се земаат неконтролирано. Оштетувањата се разликуваат по тежина - од благи и реверзибилни, до тешки некрози на црниот дроб, воспаленија, па дури и малигни тумори. За парацетамол се направени студии во светот кои покажале дека тоа е лек кој најчесто се зема неконтролирано бидејќи е лесно достапен, а можно е сериозно оштетување на црниот дроб преку два различни механизми: по краткотрајно земање кај посебно осетливи лица, особено кај оние кои консумираат и алкохол, и втор механизам - по долготрајно земање поголеми дози. Понекогаш оштетувањата можат да бидат и малигни. Ова не важи само за парацетамол, туку и за други лекови - студиите покажале дека тоа можат да бидат и антибиотици, лекови за лекување различни хронични болести и слично. Сепак, тврдењето дека парацетамолот предизвикува рак не е точно. Потребно е лекарот внимателно да го одреди секој лек кај секој пациент поединечно, да предупреди за начинот на земање и должината на лекувањето, да има добар увид во здравствената состојба на пациентот на кого му го пропишува лекот, и да предупреди на можните несакани дејства, кои се наведени и во упатството за лекот. Парацетамолот обично се пропишува краткотрајно и во мала доза, поделена во повеќе дози дневно. Во некои случаи можат да се дадат и повисоки дози, но ретко и краткотрајно. Многу е тешко да се каже дали за настанување на малигна болест е одговорен само еден агенс - тоа е можно да се утврди единствено преку големи, контролирани и сериозни научни истражувања.