Тестирање на рубеола и вакцинација пред планирана бременост

Пред бременост секако можете да направите тестирање на антитела IgM и IgG на рубеола, за да се утврди дали веќе имате антитела во организмот. Бидејќи според задолжителниот календар на вакцинација најверојатно сте ја примиле MMR вакцината која содржи и компонента против рубеола, доколку се направи тестот на IgG антитела, тој би покажал дали сте заштитени од рубеола, вклучително и во бременост. Ако се покаже дека IgG антителата се присутни, не треба да се грижите – тоа значи дека имунолошкиот систем е заштитен и можете да планирате бременост. Секако, треба да се внимава во текот на бременоста, бидејќи тоа е период кога имунитетот природно опаѓа, особено во два периода – помеѓу 6-та и 8-ма недела и по 20-та недела, кога постои поголема подложност на инфекции. Ако се покаже дека IgG антителата отсуствуваат, можно е прво да се направи вакцинација, потоа ревакцинација, а дури потоа да се планира бременост. За другите анализи, најдобро е да се консултирате со вашиот гинеколог во врска со можноста за правење на TORCH тест, со кој освен рубеола можат да се испитаат антитела и на други потенцијално опасни микроорганизми.