Пронајден полип на ултразвук - препорачана истражна киретажа - кои се опциите за третман?

За отстранување на полип во матката, метод на избор е хистероскопија, бидејќи со сонда со камера се овозможува прецизно отстранување на полипот, а истовремено се надгледува и внатрешноста на матката и отворите кон јајцеводите. Во поголемите здравствени установи, покрај класичната киретажа која се изведува „наслепо“, се препорачува и метод на полипектомија под контрола на ултразвук. Полипектомијата под ултразвучна контрола се изведува во кратка интравенска анестезија и во просек трае околу 12 минути. Полипите не се стружат од зидовите на матката, туку се фаќаат со специјални клешти, извртуваат и внимателно се вадат. Пациентката најчесто се пушта дома неколку часа по интервенцијата. Полипите на телото на матката понекогаш можат да маскираат карцином на ендометриумот, поради што задолжително се прави истражна киретажа, а добиениот материјал се испраќа на хистолошки преглед. Со киретажата се отстранува полипот, и доколку се потврди дијагнозата дека се работи за полип, дополнително лекување не е потребно.