Кои се вредностите на ТСХ и fT4 во бременост?

Постојат два хормони кои во бременост можат да доведат до промена во нивото на хормоните на штитната жлезда: хорионски гонадотропин (hCG) и естроген. hCG се синтетизира во плацентата и делува слично на ТСХ, бидејќи благо ја стимулира штитната жлезда да произведува повеќе тиреоидни хормони. Повишеното ниво на естроген доведува до зголемување на нивото на протеините кои ги врзуваат тиреоидните хормони во крвта и ги транспортираат низ организмот. При тоа, количината на слободните хормони на штитната жлезда (оние што не се врзани за протеини) обично не се менува. Овие, инаку нормални хормонски промени во бременоста, можат да ја отежнат интерпретацијата на резултатите од тиреоидните хормони. Лекарите препорачуваат проверка на нивото на ТСХ пред бременост или барем на нејзиниот почеток, особено кај жени кои се лекувани од хипер- или хипотиреоидизам, кои имаат струма (зголемена жлезда), или имаат породична историја на болест. Генерално, нормалните вредности на ТСХ во бременост треба да се движат во распон до 3-3.5. Секако е неопходно за ова да разговарате со вашиот надлежен гинеколог и ендокринолог, за да се утврди реалната состојба, дали е потребно да се направи и fT4 доколку не сте го направиле, антитела на штитната жлезда, ултразвук, и евентуално контроли на 6-8 недели, па во случај резултатот да се повтори, да ви се вклучи заменска терапија.