Што значи лоша тимпанометрија?

Тимпанометријата тип Б, која се смета за најнеповолна, значи дека постои течност (секрет) во средното уво, зад тапанчето. Доколку овие резултати остануваат лоши подолго од 3–6 месеци и покрај лекувањето, или се подобруваат само привремено, апсолутно е индицирано поставување на таканаречени аерациони цевчиња. Тие се поставуваат на тапанчето низ увниот канал и стојат обично 6–12 месеци, по што спонтано испаѓаат или ги отстранува лекарот кој ги поставил. Со тоа се овозможува нормална аерација на средното уво и слухот се враќа во нормала. Ако дете не проговори до втората година од животот, треба да се испита слухот, бидејќи намалениот слух може да предизвика доцнење во говорот, а со време влијае и на интелектуалниот и социјалниот развој на детето. Дете кое послабо чуе, послабо напредува. Оваа состојба се нарекува хроничен секреторен отитис. Доколку не се лекува навреме, оштетувањето на слухот може да стане трајно.