Што е Streptococcus pyogenes и какви заболувања предизвикува?

Streptococcus pyogenes е бактерија која може да предизвика заболување на грлото, ангина, со можно ширење на инфекцијата кон белите дробови и бронхиите. Инфекцијата може да се манифестира и со кожни промени, карактеристичен осип какви што се среќаваат кај шарлах, а може да предизвика и ревматска треска, како и заболувања на срцето и бубрезите. Заболувањето брзо се шири преку капковична инфекција и мора да се лекува со антибиотик, најчесто од групата на пеницилини, во траење од десет дена, со контрола на брис на грлото и носот и лабораториски анализи. Кога постои ревматска треска или гломерулонефритис, лекувањето е покомплицирано и подразбира подоцнежни редовни контроли и превентивни мерки. Изолацијата на заболеното лице во период од десет дена при лекување на ангина е значајна, како и одмор и мирување за време на лекувањето.