Висок АСТО титар и болки во нозете кај дете - што значи тоа?

АСТО (АСО) е медицинска кратенка за антистрептолизински титар. Со лабораториско мерење на овој титар се прикажува присуството и количината на антитела кои организмот ги создава против стрептолизин О, кој го произведува бета хемолитичкиот стрептокок од групата А (Streptococcus pyogenes). Тоа е еден од најчестите причинители на бактериски инфекции кај луѓето. Најчести болести предизвикани од оваа бактерија кај децата се стрептококна ангина (воспаление на грлото), шарлах, перитонзиларен апсцес, отитис медиа, синузитис, како и кожни инфекции - стрептококно импетиго, еризипел, флегмона, а поретко предизвикува пневмонија, сепса, менингитис и артритис. Погорениот титар почнува да расте најмалку една недела, а својата највисока вредност ја достигнува 3-6 недели по инфекцијата. Доколку нема повторна инфекција, титарот се враќа на почетното ниво во период од 6 до 12 месеци. Од ова произлегува дека тој нема практично значење во поставувањето на дијагноза на стрептококна инфекција, туку таа се поставува врз основа на клинички и други дијагностички параметри. Значењето на овој титар се согледува во тоа што тој носи мал ризик за развој на доцни последици од стрептококните заболувања - ревматска треска и постстрептококен гломерулонефритис, кои можат да остават трајни последици кај детето. Само зголемен АСТО титар без други клинички манифестации на болест не значи ништо, или подобро кажано, значи дека детето прележало некоја стрептококна инфекција, најверојатно ангина. Заклучно, се препорачува следење на титарот по еден месец, а потоа по шест месеци. Доколку титарот следи нормална динамика (најдобро е тоа да го процени лекар), терапија не е потребна. Секако, се препорачува заедничка соработка помеѓу ОРЛ специјалист и надлежниот педијатар.