Што значи растечка циста на јајник кај бебе од седум месеци?

Цисти на јајниците кај фетуси и кај доенчиња, колку и да изгледа невозможно, се јавуваат многу почесто отколку што е регистрирано, највеќе затоа што во периодот до почетокот на првата менструација ретко се контролираат. Со честите превентивни прегледи со ултразвук во последно време многу почесто можат да се визуелизираат сите промени во органите. Станува збор за промени кои значат благ пореметок на функцијата на јајникот. Цистите се сметаат за физиолошка појава и сами по себе не се опасни. Цистите најчесто настануваат во последните недели од бременоста, додека бебето е во матката, поради зголеменото лучење на хормони во постелката. Станува збор за хормони наречени гонадотропини, кои се неопходни за нормална функција на јајникот. Вообичаено е да постојат мали количини на овие хормони во возраст пред настапувањето на менструацијата, а доколку дојде до покачени вредности, настанува циста на јајник - која кај бебето се забележува при раѓање или во периодот по раѓањето. Најчестата причина за настанување на цисти може да биде и предвремено „будење“ на хормоните на хипофизата, но е можно да се појават и поради начинот на исхрана или ако девојчето користи мајчини креми за тело кои можат да содржат хормон - естроген. Цистите на јајниците до 4 см и помали често сами спонтано се повлекуваат со време. Цистите на јајниците поголеми од 4 см бараат оперативно лекување, највеќе поради можните компликации (извртување на јајникот или доколку цистата е исполнета со друга содржина). Ако цистата опстојува или се зголемува по раѓањето подолго од четири месеци, таа може да ја загрози виталноста на јајникот и затоа бара оперативно лекување. Зачувувањето на ткивото на јајникот е потешко поради малиот волумен на јајникот, но тоа е основно правило при оперативното лекување во оваа возраст. Метода на избор е и аспирација на цисти поголеми од четири сантиметри, под контрола на ултразвук, бидејќи на овој начин се намалува ризикот од настанување на компликации. Ако не настанат компликации, по правило нема други последици за понатамошната функција на јајникот. Важно е родителите да знаат дека самите цисти, по правило, не се опасни. Потребно е внимателно да се следат, најдобро во договор со детски гинеколози и детски ендокринолози. Тестот на прогестерон се прави без обзир на времето од денот - нема одредено најпогодно доба, нема осцилации на хормоните кои можат да влијаат на нивото во крвта, а крвта се вади од вена, како и кај возрасните.