Кога се затвора фонтанелата и што значи ако е широко отворена во осмиот месец?

Во текот на развојот, коските постепено срастуваат, при што се формираат шевови по нивните споеви. Последни зарастуваат фонтанелите: задната до шестиот месец, а предната, односно голема фонтанела, помеѓу деветтиот и осумнаесеттиот месец. Во поглед на зарастувањето постојат големи индивидуални разлики, но тие се сметаат за нормални варијации кај здравите деца. Кај 96 отсто од децата големата фонтанела се затвора до крајот на втората година од животот, кај 38 отсто до крајот на првата година, а кај само 1 отсто до третиот месец. Сè зависи од бебе до бебе. Голема фонтанела и одложено затворање на фонтанелите можат да се јават поради бројни причини – од нарушувања во исхраната на бебето (неухранетост, недостаток на витамин Д), до различни генетски фактори во склоп на некои синдроми, но и како последица на инфекции или штетно дејство на некои лекови (доколку такви биле присутни). Добро е кога не се работи за прерано затворање на фонтанелата, кое е поврзано со прерано срастување на коските на черепот – краниосиностоза – бидејќи во тој случај мозокот на бебето не би можел правилно да се развива. Советот е да се почека, а доколку до крајот на втората година не дојде до целосно срастување на фонтанелата, може да се побара совет од педијатар или неврохирург.