Бебе од пет месеци дење спие само на мајчините гради - што да правам?

Бебињата на возраст од 5 месеци обично имаат потреба од околу 3-4 часа дневен сон, доколку навечер добро спијат. Секое дете е различно, па на некои им треба повеќе, а на некои помалку сон. Навиката која сте ја создале е тешко да се промени и ќе ви треба доста труд, трпение и упорност. Мајките применуваат различни техники, зависно од детето. За почеток, наместо да го приспивате детето во раце, пробајте да го приспивате во люлка, количка или пеејќи му, па кога заспие да го преместите во креветче. Следете што вашето бебе сака да прави додека заспива - дали сака да смуца прст, има омилена играчка која ја гушка, или сака да гледа некоја цртана серија - и дозволете му тоа. Оставањето на детето да неутешно плаче не се препорачува, дури и од етичка гледна точка. Исто така, пробајте да создадете мирна, релаксирачка средина за спиење - можете да пуштите класична музика за приспивање, за која е докажано дека смирува бебиња. Создадете рутина пред спиење - определени активности кои ги правите пред приспивање (капење, масажа, читање, пеење) - и дајте му на бебето време да се навикне на тоа и да го поврзе со времето за спиење. Бидејќи секое бебе е индивидуа за себе, потребно е да испробате начин на приспивање кој одговара на вашето бебе и да бидете упорни во тоа, додека бебето не прифати нови услови. И никако не дозволувајте бебето да го диктира начинот на приспивање.