Зошто отокот на скочниот зглоб не поминува со месеци по повредата?

Повредите на скочниот зглоб се едни од најчестите спортски повреди. Најчесто доаѓа до истегнување на лигаментите кои обезбедуваат еластичност во движењето, а може да дојде и до пукање на капиларните крвни садови и нарушување на инервацијата. Сето ова доведува до болка, топлина на местото на повредата, оток и нарушена функција на зглобот. Кога болката и отокот се силни и придружени со хематоми, најчесто станува збор за лацерација или парцијална руптура на лигаментите. Советот е да се направи РТГ снимка на скочниот зглоб и ултразвучен преглед на мекото ткиво на стопалото, заради проценка на меѓукоскените простори и отокот, а по потреба и дополнителни испитувања. Ако повредите се чести, ако не се постави точна дијагноза или ако лекувањето не трае доволно долго, повредите лесно се повторуваат, а секоја наредна повреда потешко и подолго заздравува. Со дополнителен преглед треба да се исклучи можност за прелом на коските на стопалото и потколеницата, како и на самиот зглоб. Во такви случаи е добро во третманот да се вклучи лекар специјалист по физикална медицина и рехабилитација, за функцијата на зглобот што побрзо да се врати во нормала.