Што значи наод на спондилоза во градниот (торакалниот) дел на 'рбетот?

Според наодот на мултислајсен скенер, постои спондилоза во торакалниот, односно градниот дел на 'рбетот. Овие промени не се малигни, туку настануваат поради неадекватно, односно лошо држење на телото. Современото живеење и работа, долготрајното седење во неприродна положба доведуваат до преоптоварување и пренапрегање на скелетниот систем, а со тоа и до истрошеност на ткивото и дегенеративни промени. Најчесто заболуваат 'рбетот, колковите и колената. Конзервативното лекување подразбира симптоматско лекување, односно терапија на болката, со што е можно да се ублажат симптомите, но не и да се отстрани причината. Со примена на лекови од групата на нестероидни антиревматици доаѓа до олеснување или целосно губење на болката во дадениот регион. Физикалната терапија помага за побрзо закрепнување и спречува настанување на деформитети на 'рбетниот столб, но не и вкоченување на 'рбетните прешлени. Хируршкото лекување се спроведува кога конзервативната терапија не дава резултати и кога настане влошување на болеста, а се сведува на разни техники и пристапи за ослободување на нервните корени и 'рбетниот мозок од притисокот настанат поради дегенеративните промени. Се препорачува поздрав начин на живот, умерена физичка активност, поголема подвижност, губење на вишок килограми, правилно држење на телото, ненапрегање на 'рбетот, спиење на перница која обезбедува положба на главата и вратот во иста оска со 'рбетниот столб. Дали ќе се направи магнетна резонанца како дополнителна дијагностика, зависи од степенот на тегобите и симптомите, и секако од договорот со надлежниот лекар.