Зошто табаните се виолетови?

Според опишаното, може да се работи за вазоконстрикција, односно стеснување на крвните садови во стопалото, поради што стопалата прво се ладни, а потоа доаѓа до вазодилатација, односно проширување на крвните садови и затоплување. Треба да се исклучат одредени заболувања на кардиоваскуларниот систем, односно слаба циркулација, бидејќи стопалата се најоддалечените делови од телото. Главните причини за слаба циркулација се наследство, неправилна исхрана, дебелина, лоши навики како пушењето, недостиг на физичка активност и непридржување кон препораките при лекување на хронични болести, како на пример дијабетес. Лошата циркулација може да биде и придружен симптом на некои системски заболувања, како што е Рејнодовата болест, односно синдром, кој се карактеризира со ладнина на прстите на рацете или нозете и промена на бојата на кожата како реакција на студ или стрес. Лошата циркулација може да се подобри со затоплување на екстремитетите, елиминирање на стресот, избегнување на измрзнатини предизвикани од ниски температури, избегнување употреба на вибрирачка опрема на работа, како и внимание при употреба на лекови кои го стеснуваат луменот на крвните садови. Одредени заболувања предизвикуваат побавна циркулација на крвта во ситните крвни садови на кожата, а жените кои пушат се посклони кон нив. Секако, разговарајте со вашиот матичен лекар, бидејќи секое заболување, вклучувајќи го и Рејнодовиот синдром, најдобро се открива преку детална анамнеза и клинички преглед. Обично не се потребни дополнителни тестови, иако може да се направи капилароскопија (набљудување на малите крвни садови под микроскоп). Ако се исклучат кардиоваскуларните причини за слабата циркулација, препорачливо е преглед кај интернист-ревматолог.