Зошто детето постојано се презнојува на дланките и стопалата?

Кај вашето дете најверојатно се работи за хиперхидроза. Постојат два облика на ова состојба: идиопатска, кога не постои друга болест или состојба, и секундарна, која се јавува во рамки на некои инфекции, невролошки или ендокрини заболувања и слично. Во 90% од случаите прекумерното потење е последица на активноста на симпатичкиот нервен систем. Треба да се обидете да се елиминираат сите можни извори на стрес, кои на прв поглед можеби ниту вие ниту детето не сте ги свесни. Кај деца овој вид на потење обично се јавува уште во детството, а карактеристично е тоа што најчесто нема потење за време на сон, што укажува на примарна фокална хиперхидроза (доколку се исклучени други потенцијални заболувања). Постојат неколку различни видови третман и терапија за хиперхидроза: ботокс, антихолинергички лекови, јонтофореза, а во некои случаи и хируршко лекување. Системската терапија со антихолинергици се користи поретко бидејќи носи бројни несакани ефекти, додека локално можат да се нанесуваат соли на алуминиум и алдехидни соединенија. Советот е да се обратите кон дерматовенеролог, кој по преглед и во договор со вас може да одлучи за соодветна терапија.