Висока температура и кашлица во 33. недела од бременоста - опасност за бебето?

Доколку не сте направиле анализа на крвна слика, се препорачува да се направи, како и биохемиска анализа на ЦРП. Доколку анализите покажат посериозна бактериска инфекција, може да се пристапи кон терапија со антибиотици од групата на пеницилини (доколку нема алергија) или цефалоспорини. Доколку анализата покаже дека се работи за вирусна инфекција, се препорачува зголемен внес на течности, мирување и симптоматска терапија. Антибиотиците во овој период на бременост се релативно дозволени, но мора да се внимава кој антибиотик се дава - мора да биде од споменатите две групи дозволени антибиотици. Температура се смалува кога е над 38.5 степени, а за тоа може да се користи парацетамол и негови деривати, бидејќи се смета дека има најмалку можни несакани ефекти. Секако се препорачува консултација со надлежен лекар и гинеколог. Голем број гинеколози не сакаат да препишуваат лекови на бремени жени, што е разбирливо, но доколку општата состојба на пациентката е лоша, секогаш се дава приоритет на мајката.