Кој е третманот кога напади на мигрена траат по неколку дена?

Неопходно е да посетите невролог, кој ќе процени дали е потребна дополнителна дијагностика (доплер на крвните садови на вратот, компјутеризирана томографија на мозок, евентуално ЕЕГ - снимање на електричната активност на мозокот). Врз основа на клиничкиот преглед и резултатите од дополнителните прегледи, неврологот ќе процени дали е потребна превентивна терапија за мигрена или терапија која се применува на почетокот на мигренозниот напад. Одлуката во голема мера зависи од клиничкиот преглед, зачестеноста на мигренозните главоболки и придружните симптоми. До посетата на невролог, препорачливо е да внимавате на исхраната: избегнувајте црвено вино, ферментирани сирења, чоколадо и црно грозје, бидејќи консумирањето на овие намирници може да биде поттик за почеток на мигренозна главоболка.