Како хормоните на штитната жлезда се менуваат во бременоста?

Нормално е функцијата на штитната жлезда да се менува во текот на бременоста. Постојат два хормони кои можат да влијаат на нивото на тиреоидните хормони: хорионски гонадотропин (hCG) и естроген. hCG се создава во плацентата и делува слично на TSH, благо стимулирајќи ја штитната жлезда да произведува повеќе хормони. Покачениот естроген го зголемува нивото на протеините кои ги врзуваат тиреоидните хормони и ги транспортираат низ организмот, при што количината на слободните хормони обично остане непроменета. Овие нормални хормонски промени можат да го отежнат толкувањето на резултатите од тиреоидните хормони. Затоа лекарите препорачуваат проверка на нивото на TSH пред бременоста или барем во нејзиниот почеток, особено кај жени кои претходно биле лекувани од хипер- или хипотиреоидизам, кои имаат струма или имаат фамилијарна историја на болести на штитната жлезда. Секоја хипотиреоза во бременоста треба да се лекува со заместителна терапија со синтетички тироксин. Овој лек не е штетен за плодот, туку е неопходен за неговиот развој доколку мајката има хипотиреоза. Терапија треба да примаат и пациентки со субклиничка хипотиреоза - состојба кај која хормоните на штитната жлезда се уредни, но TSH е покачен. Кај пациентки со претходно дијагностицирана хипотиреоза обично е потребно зголемување на дозата на лекот за време на бременоста за да се одржи соодветна функција на жлездата. Хормоните треба да се контролираат на секои 6 до 8 недели и, по потреба, дозата на лекот да се прилагодува. Во бременоста, хипотиреозата се дефинира со вредност на TSH над 2.5 mIU/L, заедно со намалена вредност на слободниот тироксин (FT4). Субклиничка хипотиреоза е состојба со вредности на TSH помеѓу 2.5 и 10 mIU/L, но со нормално ниво на FT4.