Што значат фокалните промени во црниот дроб?

Со терминот фокални промени во црниот дроб најчесто се опишуваат цисти (ограничени, инкапсулирани промени исполнети со жолчна или хеморагична содржина, или ехинокок), хемангиоми (изувиени крвни садови) но и метастази. Препорачливо е да се направи ултразвук на стомакот, односно на црниот дроб, бидејќи со ултразвук може да се утврди дали станува збор за циста - која се гледа како анехогена структура, хемангиом - хиперехогена, дискретна структура која понекогаш е тешко забележлива и може со времето да исчезне, или метастатски промени - кои се визуелизираат како изразито хиперехогени промени што лесно се препознаваат. Советувам да се направат и дополнителни крвни анализи, односно биохемиски анализи како седиментација, ЦРП, фибриноген, како и хепатограм - АСТ, АЛТ, ГГТ, директен и вкупен билирубин. Доколку е потребно и доколку лекарите имаат сомнеж, треба да се направи и биопсија на промената. Важно е да се биде упорен и да не се чека предолго со дијагностичката обработка.