Зачестено трепкање со очи кај дете - дали е тик?

Според описот, кај детето најверојатно се работи за тикови. Тиковите најчесто се реакција на стрес, траат од еден месец до една година, се јавуваат три пати почесто кај момчињата и обично поминуваат спонтано доколку не се обраќа посебно внимание на нив. Однесувајте се како да не постојат, но потражите помош од стручно лице доколку му пречат на детето во секојдневното функционирање и стануваат сè почести. Педијатрите, врз основа на проценка, обично упатуваат дете на преглед кај невролог или на разговор со психолог. Доколку тиковите се невролошки по природа, се препишува соодветна терапија, но ако проблемот е психолошки, детските психолози брзо и лесно откриваат што му создава стрес на детето и советуваат како родителите да им помогнат тоа да го надминат. Најважно е да се пронајде причината, бидејќи само така тиковите можат да се запрат, односно ќе престанат кога детето ќе се ослободи од стресната ситуација. Иако изгледаат загрижувачки, не паничете - многу мал процент деца имаат потреба од лекови или терапија, бидејќи најчесто сè поминува само од себе. Ако за тиковите не се зборува премногу, детето ќе биде помалку свесно за нив. Ако детето знае дека ги прави, охрабрете го и кажете му дека ќе поминат, дека мускулите со време ќе се опуштат. Поддршката од блиската околина е најважна, а стручна помош треба да се потражи само доколку тиковите создаваат проблеми во дружењето со врсници, ако поради нив детето не може да ги извршува своите обврски, ако се шират и на други делови на телото освен главата, лицето и рамениците, ако стануваат сè почести, односно ако детето постојано ги прави и ако траат подолго од една година. Затоа, прво пробајте да разговарате со детето дали можеби постои некоја стресна ситуација во неговата околина - во училиштето или со другарчињата. Доколку тиковите продолжат, разговарајте со педијатар, кој евентуално ќе ве упати на преглед кај невролог или психолог.