Што е Паркинсонова болест?

Паркинсонова болест е заболување на нервниот систем кое се карактеризира со намалено лучење на супстанцијата допамин во делот на мозокот што има важна улога во контролата на волните движења. Во базалните ганглии постои недостаток на клетки кои произведуваат допамин, а причината за пропаѓањето на тие клетки сè уште не е позната. Лекувањето на симптомите на болеста е успешно, особено во раниот стадиум, но не го запира напредувањето на болеста. Комбинацијата на лекови се разликува кај различните пациенти, а лекувањето бара време и трпение. Покрај земањето специфични лекови, важни се и начинот на исхрана и вежбањето. Во некои случаи неконтролираните движења не можат да се сузбијат со лекови. Препорачлива е редовна контрола кај лекар со цел да се утврди ефектот на терапијата или да се направи евентуална промена на терапијата.