Мозочен удар – проблеми со исхраната, што да се прави?

Оштетувањето на левата (доминантна) хемисфера на мозокот, која ја контролира десната половина на телото, доведува до слабост или парализа на десната страна, промени во сетилноста (намален допир, трпнење), а може да предизвика и говорни пречки – отежнат изговор, разбирање и пишување. Исходот по мозочен удар зависи од големината на ударот, зафатената страна, артеријата што е затната, годините, придружните болести и другите ризик-фактори – дали пациентот ќе се опорави спонтано или ќе остане со инвалидитет. Колку е важно рано да се помогне на мозокот при настанување на удар, толку е важно рано да се започне и со рехабилитација, бидејќи во првата година успешноста на опоравувањето е најголема. Пациентите што го преживеале мозочниот удар и ја поминале фазата на витална загрозеност, уште во болница започнуваат со рана пасивна физикална рехабилитација, која подоцна продолжува во специјализирани центри. Неопходно е веднаш по излегувањето од болница, откако состојбата ќе се стабилизира, да се побара упатување кон физикална медицина и рехабилитација, односно кон специјализирани центри (бањи), каде наменски се работи со пациенти по мозочен удар. Таму пациентите повторно учат одредени обрасци на однесување, одење, па дури и хранење, а персоналот е обучен за работа со лица по мозочен удар. Што се однесува до исхраната, треба да се исфрлат заситените масти и концентрираниот шеќер, а наместо нив да се користат ненезаситени масни киселини и природни шеќери од растително потекло. Се препорачува што повеќе сурово или варено овошје и зеленчук, доколку е неопходен шеќер – нека биде кафеав, маслиново масло, и што повеќе риба, особено сина (но не димена). Месото треба да биде посно, бело и варено, лебот темен, со доста интегрални житарки. Се забранува алкохол, освен по една чаша црвено вино дневно. По мозочен удар пациентите секојдневно треба да бидат физички активни – на пример, прошетка од 30 до 60 минути наутро или попладне, но не на директно сонце. Пациентот не смее да се присилува да јаде, но во моменти кога сака да јаде, треба да му се овозможи храна според неговата желба. Препорачливо е да се направат и дополнителни прегледи за да се потврди дека проблемот со исхраната е последица само на мозочниот удар, а не на некоја друга причина.